Өөрийгөө муулнаа

Эзэгтэй хүний талаасаа би маш муу эзэгтэй юм. Хичнээн гоё хоол салад хийгээд эд нар иддэггүй болохоор хийдэг ч үгүй. (Гэхдээ томроод иддэг болохоор нь урамтай нь аргагүй хийж магад). Юм оёж ёстой чаддаггүй. Чадахын төлөө ч тэмцдэггүй, товч унах, оймс цоорчихвол өө ядаргаа л гэж боддог. Тэгж тэгж нэг юм тогтоож торгоож өгдөг. Оёод ч найдваргүй болчихсон оймыг шууд хаянаа л гэдэг... Харин хэдэн дэрний уут оёсоон оёсон бас...


Эргээд хоол руу орноо, гоё ээж, дэлгээн мэтийн мундаг хоол хийдэг хүмүүсийн хажууд бол би нярай хүүхэд л гэсэн үг. Яг үнэнийг хэлэхэд, өчнөөн ажил болж хийж хийчихээд тэгээд идээд л болоо гэж бодогдоод байдаг шд, тэнэг байгааз... нэг хэсэг цэцэгт байцаатай найзлаад янз бүрийн юм хийсэн чинь манай гурав шал заваан юм гээд идэхгүй байгаам чинь, өөрөө дургүйгээр хүртэл идэж байж дуусгасан...

Жимс, ногоо, даршилсан хүнс, хиам зэргийг авах гэхээр л биенд муу, хор гэж бодогдоод барагтаа авч чадахаа байсан. Өндөг тахиа бас. Уул нь хор гэж бодмооргүй л байна. Даанч сэжигч юм болохоороо тэгээд бодчихно. Тэгээд би юу идэж байна гээч. Хааяа нэг алим банан авч идэж жимсний хорхойгоо дарна. Монгол ногоо байх гэж найдаад маш багаар авч хэрэглэнэ. Тэгээл нөгөө иддэг хоол, гурилан боорцог талхаар л өөрийгөө зогоодог шд. Үүнээсээ ч залхжийна, би ер нь асар дуршилгүй хүн юмаа. Сайхан идэж уугаад, тос даагаад, тарган цатгалан төрхтэй болмоор л байна шүү...

Гурил будаа гоймон мах стандарт хэдээ эрхбиш хэрэглэж байна. Гурилаа хивэгтэй, будаагаа гурвалжин будаатайгаа хааяа холиод, махаа өөхнөөс нь ялгаад л үзжийн даа. Талхаа харин есөн шидийн юмтай холино шүү, вареннь, элэгний нухаш, масло, цөцгий, хөдөөнөөс ирсэн өрөм гэх мэтээр... Ер нь тэгээд янз янзын юм аваад тавьчихаар муутгаад хаячихна. Лаазтай томат, вандуй, шошыг хамаг жаахныг нь л авахгүй бол хэд хэдийг муутгаад хаяж байлаа...

Эцсийн эцэст би хоол ундаа нэг их гоё дуршил, таашаалтайгаар идэж чадахгүй байна аа... Би үнэхээр тэнэг сэжигч хүн юм байх даа... Лаазалсан загас авахаар хөргөгчөөр дүүрэн муухай үнэртэнэ, хааяа кимчи авахаар бас муухай, гэхдээ амыг нь хумиад хавчаардчихдаг болсон, сармис аваад байнга идэхгүй байж байгаад хатаагаад хаячихсан гэх мэт...

Энэ компьютерийг хаширтал сууна, нүдээ ч хайрлахгүй. Үнэнийг хэлэхэд би нүдний дусаагуур нэг ч удаа хэрэглэж үзээгүй. Тэгсэн мөртлөө би цагаан нь цав цагаан тунгалаг эрүүл саруул сайхан нүдтэй баймаар санагддаг. Нүд юм л бол улайна, цагаан нь шаргал харагдаад байдгийн өөхтэй юм байлгүй. Тэгээд пс дээр ачаалалтай суудаг гээд ойлгочих, надаа нүдний гайгүй дусаагуур санал болгоорой, хаана байдаг, үнэ хөлстэй нь.

Би үг цээжилж чадахгүй байна, миний ой тогтоолт хаачихсын бүү мэд. Анх англи хэл сурч байхдаа нэг хэлүүлээл үг тогтоодог байлаа, одоо миний англи хэлний багтаамж чихэлдээд нэг нэгийгээ гаргаж хаяад байгаа юм болов уу гэсэн. Би өшөө илүү үг мэддэг болмоор байна, би тархиа хөгшрүүлмээргүй байна...

Би их зожиг дуу муутай хүн юм шиг байна. Нэг хүнтэй удаахан байвал ярих ч юм олдохгүй хэцүү. Ярина гэдэг үнэхээр залхуутай ажил юм шиг ээ. Ээж орой ирээд дэвэн дэлхийн юм бураад, өмнө нь ярьсан юмаа дахиж яриад, бүр миний өөрт нь хэлж байсан юмыг эргүүлээд надаа ярьж өгөөд байдгийг нь би гайхдаг. Ээж хөгширсөн юм болов уу гэхээр, хөгширсөн ч яриа ч юм шиг байгаан. Би огт өөр хүн.

Нэг хүнээ хэд хэд харж байж тогтоодог. Үнэхээр таниа муутай. Манай нөхөр намайг хамаатан садан, найз нөхөдтэйгээ танилцуулчихаад, араас нь нэмэлт тайлбар тавьдаг шд. "Таниа муутай, дараа нь чамтай таарвал танихгүй байж магадгүй шүү" гэж. Би үнэхээр хүүхнүүд шиг хүнийг тас ширтээд, дээрээс нь доошоо гүйлгээд бүлтийгээд байдаггүй хүн л дээ. Тэр ч нөлөөлдөг байх. Зэрвэсхэн харсан хүнээ ямар хувцастай, юу зүүснийг нь ч хараагүй байдаг. Багадаа санаа зовсоор байгаад тэгж хараад сурчихсын. Би хүнийг нэвт шувт ширтэж шинжиж сонжих дургүй, сураа ч үгүй болохоор тэр юмуу, ёстой хүн танихдаа маруухан.